သမုဒယအတုံးအခဲတဲ့...
တည်ငြိမ်မှုရဲ့ နောက်ကွယ်မှာ
တိကျသော သိရှိခြင်းတွေ ရှိတယ်။
အသံတွေဟာ နားထဲကို ခုန်ပေါက်ဝင်
ဂုတ်ကြားဆီကလည်း ဖြစ်မယ်
မဟုတ်မတရားတွေနဲ့ တန်ဆာဆင်ထားတာလည်း ဖြစ်မယ်
မသက်ဆိုင်တော့တာကလည်း
အသေအချာ ရေရေရာရာ
နင်းခဲ့တဲ့ ရက်တွေကို ပြန်လှည့်ကြည့်
ကြွနေတဲ့ ခြေလှမ်းကို ငုံကြည့်ရင်း
ကိုယ့်အဖို့လည်း
တနင့်တပိုးတော့ ဖြစ်ခဲ့တယ်။
ပြေးထွက်ခဲ့
တစ်ယောက်တည်း ယောက်ယက်ခတ်
ငါဟာ...
ကားတွေ ပိတ်တယ်
လူတွေ ကျပ်တယ်
လမ်းပေါ်မှာ...
မသက်ဆိုင်တော့တဲ့ ညနေခင်းကတော့
လှပဆဲပါပဲ။
တစ္ဆေ (၆)
အလုပ်သင်တစ္ဆေသာ ဖြစ်ကြောင်း
အော် အော် ပြောရတာ ငါ့မှာ
သူတို့တွေကလည်း
ကြောက်တတ်လိုက်တာ
အလုပ်သင်တစ္ဆေသာ ဖြစ်ပါကြောင်း
အော် အော် ပြောရတာ ငါ့မှာ။
(တစ္ဆေ ကဗျာစုများ)
တစ္ဆေ (၅)
ခြေသံမကြားရအောင်
ငါ အသာနင်း
ဘယ်သူ့မှ မသိအောင်ပါ
အမှောင်ထုထဲ ခဏခိုမယ်
တစ်ယောက်တည်းဆိုတော့
ငါ....
ကြောက်တယ်။
(တစ္ဆေကဗျာစုများ)
အကြိမ်ကြိမ်အခါခါ လဲပြို
အကြိမ်ကြိမ်အခါခါ ငါရှုံး
အမြဲစကားတစ်ခွန်း ပြောမိတယ်
နောက်..........ဘယ်တော့မှ....
ပြီးတော့ ပြန်ပြီးထတယ်
အမှတ်မရှိသလိုမျိုးပေါ့
အတွေးကို ထိခတ်နေတာက
မိုးစက်တွေများလား?...
ဒီလိုနဲ့ မိုးချုပ်ပြန်ပြီ
အမှောင်ထဲမှာတောင် နေသားကျ
တစ်ပိုင်းတစ်စဆိုနေကြသီချင်းကို
ကော်ဖီခွက်ထဲ ထည့်မျှောလိုက်တယ်
ခပ်တိုးတိုးတစ်ခွန်း ထပ်ပြောရင်း
မနက်မိုးလင်းမှာ ငါမလိုချင်...
တစ္ဆေ (၄)
ပျော်ရွှင်ခြင်းအကုန်
မင်းဆီ လာပါစေ။
တိတ်ဆိတ်ခြင်းသာ
ငါဆီ ကျန်ခဲ့ပါ။
(တစ္ဆေ ကဗျာစုများ)
နေရတာ မကောင်း
ခေါင်းအုံ
ဇက်ကြောတက်
ငွေနောက်လိုက်ချင်
ဝနေတယ်
တစ်နေ့ နောက်တစ်နေ့
အကုန်အတူတူ
ပြီးတော့လည်း...
ဒါပါပဲ။
တစ္ဆေ (၃)
အားရပါးရကို ခြောက်လှန့်ပြီးချိန်မှာ
တစ္ဆေဟာ
ခဏထိုင်အမောဖြေနေရဲ့
ငါ့မှာသာ...
(တစ္ဆေကဗျာစုများ)
တစ္ဆေ (၂)
မကြောက်တတ်တဲ့
အယောင်ဆောင်ထားသော
ငါ
ခြောက်လှန့်တတ်တဲ့
အယောင်ဆောင်ထားသော
နင်...
(တစ္ဆေကဗျာစုများ)
